என் சமையலறையில்

பருப்பு உருண்டை குழம்பு

2010-09-18T12:36:00.007+05:30

துவரம் பருப்பு + கடலை பருப்பு - 150 கிராம் (ஊற வைக்கணும்)
மிளகாய் வற்றல் - 8
பச்சை மிளகாய் - 2 ( நறுக்கியது )
வெங்காயம் - 2 ( பொடியாக நறுக்கியது )
புளி -
சாம்பார் பொடி - 21/2 டீஸ்பூன்
தேங்காய் , பூண்டு ‍ அரைச்சுக்கணும்
மஞ்சள் தூள் - 1 டீஸ்பூன்

செய்முறை

பருப்பை நன்றாக ஊறிய பின் களைந்து, வடிய வைத்து, தேவையான உப்பு, மிளகாய் வற்றல் போட்டு, சற்று கரகரப்பாகவும், கெட்டியாகவும் அரைச்சுகோங்க. அதில் வெங்காயம் சேர்த்து சின்ன சின்ன உருண்டையா உருட்டி குக்கரில் (அ) இட்லி பாத்திரத்தில் வேக வைக்கணும்

புளியை 3 டம்ளர் தண்ணீரில் கரைத்து வைத்துக் கொள்ளவும்.

கடுகு தாளித்து, புளி தண்ணீரில், உப்பு, மஞ்சள் பொடி, சாம்பார் பொடி , ப. மிளகாய் அரைச்ச தேங்காய் போட்டு கொதிக்க விடவும்.

குழம்பு சேர்ந்து கொதிக்கும் போது, பருப்புருண்டைகளை போட்டு, அடுப்பை குறைத்து எரிய விடவும்.

பருப்புருண்டை உடையாதவாறு கிளறி இறக்கவும்.

பருப்பு உசிலி

2010-05-17T12:19:00.001+05:30

தேவையான பொருட்கள்:

துவரம் பருப்பு : 2 கப்
வர மிளகாய் - 7
பீன்ஸ் அல்லது
கொத்தவரங்காய் - 1 1/2 கப் ( வேக veiththathu)

பொடி பண்ண:
கறிவேப்பில்லை - சிறிது
சீரகம் - ஒரு ஸ்பூன்

தாளிக்க
ஆயில் - 3 ஸ்பூன்
கடுகு - கொஞ்சம்
பெருங்காயம் தூள் - கொஞ்சம்

செய்முறை :
பருப்பை இரண்டு முதல் மூன்று மணி நேரம் ஊற வைக்கவும்,
அத்துடன் மிளகாய் சேர்த்து மிக்ஸ்யில் அரைக்கவும் கரகரப்பாக அரைக்கவும்.
எண்ணெய் தடவிய இட்லி தட்டில் அரைத்த விழுதை 15 நிமிடம் வேக விடவும்.
வெந்த பருப்பை உதிர்த்து விடவும்.

அடி கனமான பாத்திரத்தை ( இரும்பு வடசட்டி பெஸ்ட்) வைத்து எண்ணெய் ஊற்றி கடுகு போட்டு பருப்பையும் போடவும்.
சிறிது நேரம் உடைத்து விட்டு கிளறவும்,
வெந்த காய், பொடி செய்த கறிவேப்பில்லை, பெருங்காயம், உப்பு போட்டு மேலும் சிறிது எண்ணெய் ஊற்றி சிறிது குறைந்த தணலில் வேகனும்.
சிறிது பிரவுன் கலர் வந்து நல்ல வாசம் வந்ததும், பருப்பு உசிலி ரெடி.

வேறு முறை உள்ளது, ஆனால் அது நெறைய எண்ணெய் செலவாகும். இது எளிய முறை. மோர் குழம்புக்கு பெஸ்ட் துணை இந்த உசிலிதான்.

காரட், கோஸ், வாழைப்பூ, குடமிளகாய், என்று உங்களுக்கு பிடித்த எந்த காய் வேண்டுமானாலும் சேர்த்து செய்யுங்கள்.

பிரியாணி

2010-05-09T14:08:00.000+05:30

பிரியாணி - ஒரு திருப்தியான விருந்து சாப்பிட உணர்வு பிரியாணியில் மட்டும் தான் வரும். பிளைன் பிரியாணி பண்ணுவது ரொம்ப சுலபம்.

தேவையான பொருட்கள்:

பிரியாணி அரிசி - 2 கப்
தண்ணீர் - 3 1/4 கப்.
தயிர் - 2 ஸ்பூன்
ஒரு எலுமிச்சை பழம்
மிளகாய் போடி - 2 ஸ்பூன்

நறுக்க வேண்டியது:

தக்காளி - கால் கிலோ
பெரிய வெங்காயம் - கால் கிலோ
புதினா - ஒரு சின்ன கட்டு
மல்லி தழை - ஒரு சின்ன கட்டு
பச்சை மிளகாய் - 3

அரைக்க :

இஞ்சி - ஒரு பெரிய துண்டு
பூண்டு - 10 பல்
பட்டை - 5 கிராம்
இலங்கம் - 10
ஏலக்காய் - 4

தாளிக்க

ஆயில் - 50 கிராம்
நெய் - 50 கிராம்
பிரியாணி இலை - கொஞ்சம்

அரிசியை சரியாய் இருபது நிமிடம் தண்ணிரில் ஊற வைக்கவும்.

ஒரு பாத்திரத்தில் ஆயில் ஊற்றி பிரியாணி இலை, வெங்காயம் போட்டு வதக்கவும்,
பின் தக்காளி சேர்த்து அரைத்த இஞ்சி பூண்டு விழுது சேர்த்து வதக்கவும், அத்துடன் புதினா, மல்லி, மிளகாய் சேர்க்கவும். அப்பறம் தயிர், மிளகாய் தூள்.
இப்ப தண்ணீர் அளந்து ஊத்தணும், உப்பு, லெமன் சேர்த்து கொதிக்க விடனும்.

கொதி வந்ததும் அரிசியை போட்டு, அதிக தீயில் சரியாய் 7 முதல் 10 நிமிடம் மூடி போட்டு வைக்கவும். பின் மீதி நெய்யை போட்டு கிளறி சமன் பண்ணி மிக குறைந்த தீயில் 10 நிமிடம் மட்டும் வேக விடவும். கீழே இறக்கி மூடியின் மேல் தணல் அல்லது சுடு தண்ணீர் பாத்திரம் போடு 15 நிமிடம் வையுங்கள். பிரியாணி ரெடி.

முக்கியமா கவனிக்க வேண்டியது:
1. பூண்டை தோலுடன் தான் அரைக்கணும்
2. தண்ணீர் எவ்வளவு அரிசியோ அதில் இரண்டு மடங்குக்கு ஒரு கப் குறைத்துதான் போடனும்.
3. சொன்ன டைம்க்கு மேல வைச்சு பிரியாணி குலைந்து கஞ்சி ஆனால் நான் பொறுப்பு அல்ல.
4. மேற்சொன்ன பொருட்களை வரிசையாக தான் போடனும்.

பேல் பூரி

2009-08-17T21:52:00.004+05:30

சமையலறையில் மூணு மாசமா ஒண்ணும் இல்லைனு பார்த்ததில் இருந்து ஏதாவது பதிவு போடணும்னு கை துறுதுறுக்குது. அதனால் சிம்பிளா "பேல் பூரி".

தேவை:
அரிசி பொரி - 1 கப்
பெ. வெங்காயம் (பொடியாக நறுக்கியது) - கால் கப்
தக்காளி (பொடியாக நறுக்கியது) - கால் கப்
கேரட் (துறுவியது) - கால் கப்
ஓமப்பொடி - 2 மே.கரண்டி
காராபூந்தி - 2 மே.கரண்டி
உப்பு - சிறிதளவு

சட்னி செய்ய:
கொத்துமல்லி இலை - கைப்பிடி
புளி - நெல்லிக்காய் அளவு
வெல்லம் - சிறிதளவு
காய்ந்த மிளகாய் - 1
கொட்டை நீக்கிய பேரீச்சம்பழம் - 2

செய்முறை:
சட்னி செய்யக் கொடுத்துள்ள பொருட்களை மிக்ஸியில் நன்கு அரைத்துக் கொள்ளவும். பொரி, வெங்காயம், தக்காளி, கேரட் முதலியவற்றைக் கலக்கவும். இலேசாக உப்பு தூவிக் கொள்ளவும். இவற்றுடன் சட்னியைச் சேர்த்து நன்கு கலக்கவும். பின் ஓமப்பொடி, காராபூந்தி தூவவும். சிறிது உருளைக்கிழங்கு சிப்ஸும் உடைத்து சேர்க்கலாம்.

உடனே சாப்பிட பேல்பூரி தயார்.

சிக்கன் பர்கர்

2009-05-04T22:44:00.007+05:30

இப்ப குட்டீஸ்க்கு பிடிச்ச உணவெல்லாம் கான்சர் வரும் உடம்புக்கு நல்லதில்லைனு சொல்றதால வரிசையா வீட்ல அதை எல்லாம் எப்படி பண்றதுனு கத்துக்க வேண்டி இருக்கு. இப்ப வீட்ல லேட்டஸ்ட் அறிமுகம் "சிக்கன் பர்கர்"

தேவை:
பர்கர் பன் - 2
எலும்பில்லா கோழிகறி - 100கி
முட்டை (வெள்ளைக்கரு மட்டும்) - 1
வெங்காயம் - 4 துண்டு
பூண்டு - 2 பல்
உப்பு, மிளகு - சுவைக்கு
ரொட்டி துகள்
எண்ணெய்

செய்முறை:
பர்கர் பன்னை இரண்டாக வெட்டி, சிறிது வெண்ணெய்/நெய் விட்டு தோசைக்கல்லில் டோஸ்ட் செய்து கொள்ளவும்.
கோழிக்கறியை வேக வைத்து எடுத்துக் கொள்ளவும். அதனுடன் முட்டை, வெங்காயம், பூண்டு, உப்பு, மிளகு சேர்த்து மிக்ஸியில் நன்கு அரைக்கவும். இந்த கலவையை கையால் "கட்லட்" போல், அதாவது 1/2 அங்குல உயரத்திற்கு சிறிய வட்டமாக தட்டிக் கொள்ளவும். இதை ரொட்டித் துகளில நன்கு புரட்டி தோசைக்கல்லில் இருபக்கமும் நன்கு சிவக்கும் வரை டோஸ்ட் செய்யவும். இதை patty என்பார்கள்

டோஸ்ட் செய்த பர்கர் பன்னின் நடுவில் patty வைக்கவும்.இதனுடன் சாஸ் சேர்த்து சாப்பிடலாம் (அ) கீழே கூறியவாறு அலங்கரித்து/சுவைகூட்டி சாப்பிடலாம்.

அலங்கரிக்க:
தக்காளி துண்டுகள்
வெள்ளரி துண்டுகள்
செலரி
மயோனிஸ் - 1 தேக்கரண்டி
முட்டை கோஸ் துருவல்

ஒரு பர்கர் பன் மீது patty வைத்து, அதன் மீது தக்காளி, முட்டைகோஸ், செலரி, வெள்ளரி வைத்து மயோனிஸை அதன் மீது ஊற்றி மற்றொரு பர்கர் பன் வைக்கவும். இவை அனைத்தையும் ஒரு toothpick கொண்டு இணைக்கவும். சுவையான பர்கர் தயார்

தக்காளி ஊறுகாய்

2009-04-03T22:29:00.004+05:30

1/2 கிலோ தக்காளியை ஒரளவுக்கு சன்னமான துண்டுகளா கட் செஞ்சுக்கோங்க. அதுல மஞ்சள்தூள், பெருங்காய்ம், புளி, கல் உப்பு எல்லாம் கொஞ்சமா போட்டு நல்லா பிரட்டி விட்டு வெயில வைச்சுடுங்க. ஒரு இரண்டு இல்லாட்டி மூணு நாள் நல்லா காய வைங்க. தக்காளியில இருக்கிற தண்ணி எல்லாம் வடிஞ்சு காயணும். பிறகு தக்காளியை மிக்சியில போட்டு வரமிளகாய் சேர்த்து நல்லா நைசா அரைக்கணும்.அப்புறம் நல்லெண்ணெய்ல கடுகு தாளிச்சு விட்டு தக்காளி விழுதை போட்டு அது கிளறுங்க. நல்லா கெட்டியா பாத்திரத்தில ஒட்டாம வரும்போது இறக்கி வெச்சுடுங்க. சாதத்துக்கு சைட் டிஷ்ஷா இல்லாம மெயின் ஐட்டமாவே இதை உபயோகிக்கலாம். இட்லி, தோசை, சப்பாத்திக்கு கூட சூப்பரா செட் ஆகும். ஒரு பதினைஞ்சு நாள் வரை வெச்சு உபயோகப்படுத்தலாம்.

இன்னும் ஒரு முறை

தக்காளியை சுடுதண்ணியில் போட்டு ஒரு ரெண்டு நிமிசம் வெச்சு இருந்து அப்புறம் எடுத்து தோல் எடுத்துடுங்க. அதோட மிளகாய்தூள், பூண்டு, உப்பு சேர்த்து அரைச்சு வைங்க. ஒரு வாணலியில பெரிய வெங்காயம் தாளிச்சு விட்டு அரைச்ச வெச்ச தக்காளி விழுது போட்டு அத்தோட கொஞ்சம் புளித்தண்ணி விட்டு நல்லா கெட்டியா வர்ற வரை கொதிக்க வைங்க. இதுவும் நல்லா இருக்கும். ஆனா ஒரு வாரம் வரைதான் இதை உபயோகிக்க முடியும்.

பாஸ்தா

2009-03-20T20:56:00.014+05:30

வீட்டில் நூடுல்ஸுக்கு "நோ" சொல்லிவிட்டதால் , இப்ப குட்டீஸோட ஈர்ப்பு பாஸ்தா. விடுவோமா? எப்படி பண்றதுனு கத்துகிட்டு இப்ப வீட்டிலேயே அந்த ருசியைக் கொண்டு வந்தாச்சு. இப்ப குட்டீஸ் நூடுல்ஸை மிஸ் பண்றது இல்லை.

தேவை:
பாஸ்தா - 200g
மொசரல்லா சீஸ்

வைட் சாஸ் செய்ய:
வெண்ணெய் - 2 மே.கரண்டி
மைதா மாவு - 2 மே.கரண்டி
பால் - 2 கப்

ருசிக்கு
உப்பு
மிளகு

செய்முறை
பாஸ்தாவில் "பென்னெ", "மக்ரோனி" "பெளடைஸ்" என்று அதன் வடிவத்தைப் பொறுத்து பல பெயர்களில் கிடைக்கும். உங்கள் குட்டீஸுக்குப் பிடித்ததை தேர்வு செய்யுங்கள். பொதுவாக பாஸ்தாவை வேக வைக்கும் முறை குறிப்பிடப்பட்டிருக்கும். நல்ல கொதிக்கும் நீரில் பாஸ்தா போட்டு உப்பு மற்றும் 1 தேக்கரண்டி எண்ணெய் சேர்த்து 8-10 நிமிடங்கள் வேகவைத்து வடித்து எடுத்துக் கொள்ள வேண்டும்.

வைட் சாஸ் செய்ய:
வாணலியில் வெண்ணையை உருக்கி, மைதா மாவைச் சேர்க்கவும், பின் பாலை ஊற்றி அடுப்பை மிதமான தீயில் எரிய விட்டு, கிளறிக் கொண்டே இருக்கவும். சற்று நேரத்தில் குமிழிகள் தோன்றும், சாஸும் சற்றே கெட்டியாகத் தொடங்கும். இப்பொழுது இறக்கி விடவும்.

சீஸைத் துருவிக் கொள்ளவும். பாஸ்தா, வைட் சாஸ், சீஸ் துருவலை சேர்த்து கலக்கவும். தேவையான உப்பு மற்றும் மிளகுத் தூள் (வெள்ளை மிளகு தூள் என்றால் நிறம் மாறாது) சேர்க்கவும். இதை அடுப்பில் ஒரு ஐந்து நிமிடம் மிதமான தீயில் வைக்கவும் (அ) மைக்ரோவேவ் அவனில் ஐந்து நிமிடம் வைத்து எடுக்கவும். சுவையான பாஸ்தா தயார்.

டிப்ஸ்
1. நான் உப்பு மிளகோடு துளசி இலைகளைத் தூள் செய்து flavor-க்கு சேர்த்தேன். இதை basil flavor என்கிறார்கள்.
2. மொசரல்லா சீஸ் போல் செடார் சீஸ் சேர்த்தும் செய்யலாம்
3. சிறிதளவு வொயிட் சாஸைத் தனியாக எடுத்து வைத்துவிட்டு பரிமாறும்பொழுது சேர்த்து பரிமாறினால் பாஸ்தா dry-ஆக இருக்காது
4. வொயிட் சாஸ் ரொம்ப கெட்டியாகி விட்டால் இன்னும் கொஞ்சம் பால் சேர்த்துக் கொள்ளலாம்

உருளைக்கிழங்கு சாகூ

2009-03-15T23:52:00.059+05:30

ரம்யாவின் உருளைக்கிழங்கு சைடு டிஷ்!!

இந்த சைடு டிஷை பூரி, சப்பாத்தி, மற்றும் தோசைக்கு தொட்டுக் கொள்ளலாம். மிகவும் அருமையா இருக்கும்.

தேவையான பொருட்கள்
================================
1. 4 உருளைக்கிழங்கு

2. 2 பெரிய வெங்காயம்

3. 3 நாட்டுத் தக்காளி

4. 10 பல் பூண்டு

5. இஞ்சி தேவையான அளவு

6. 2 பட்டை

7. 4 லவங்கம்

8. 2 டீஸ்பூன் மல்லிதூள்

9. 2 டீஸ்பூன் சீரகப்பொடி

10. மிளகாய்ப்பொடி தேவையான அளவு

11. மஞ்சள் தூள் தேவையான அளவு

12. உப்பு தேவையான அளவு

செய்முறை விளக்கம்
========================

உருளைக்கிழங்க நன்றாக வேகவைத்து தோல் உரித்து வைத்துக் கொள்ளவும்.

உரித்த உருளைக்கிழங்கில், ஒரு உருளைக்கிழங்கை தனியே எடுத்து வைத்துக் கொள்ளவேண்டும். மற்றவைகளை துண்டுகளாக்கி வைத்துக் கொள்ளவும்.

பெரிய வெங்காயத்தை சிறுதுண்டுகளாக நறுக்கி வைத்துக் கொள்ளவும். பிறகு தக்காளியையும் பொடியாக நறுக்கி வைத்துக் கொள்ளவும்.

முதலில் அடுப்பில் வாணலியை வைத்து எண்ணெய் ஊற்றி அதில் இஞ்சி பூண்டு விழுதை போட்டு சிறிது வதக்கியபின் அதனுடன் லவங்கம், பட்டை சேர்த்து சில விநாடிகள் வதக்கவும். பிறகு நறுக்கிவைத்த வெங்காயம் சேர்த்து வதக்கவும். தேவையான அளவு மிளகாய் பொடியை சேர்க்கவும். வெங்காயம் சிறிதளவு வதங்கியவுடன் நறுக்கி வைத்திருந்த தக்காளி சேர்த்து நன்றாக வதக்கவும். இப்போது எல்லாம் ஒன்று சேர்ந்து பொன்னிறமான கலவையாக மாறி இருக்கும்.

இந்த கலவையுடன் துண்டுகளாக்கிய உருளைக்கிழங்கு, தண்ணீர், உப்பு மற்றும் மஞ்சள்தூள் சேர்த்து சில நிமிடங்கள் கொத்திக்க வைக்கவும்.

இந்த கலவையுடன் கொஞ்சம் போட்டு நன்றாக கொதிக்கவிடவும்.

பிறகு இதனுடன் தனியாக எடுத்து வைத்த ஒரு உருளைக்கிழங்கை நன்றாக மாவு போல் பிசைந்து இந்த வதங்கிய கலவையுடன் கலந்து சிறிது நேரம் கொத்திக்க வைக்கவேண்டும்.

உருளைக்கிழங்குடன் சேர்ந்து வெந்து நன்றாக கிரேவியாகி விடும்.

கிரேவி சிறிது கெட்டியாக இருக்க இந்த பிசைந்த உருளைக்கிழங்கு உதவுகின்றது.

இதனுடன் தனியா பொடி மற்றும் சீரகப் பொடி சேர்க்கவும்.

வெந்த கலவையை அழகான ஒரு பௌலில் எடுத்து, அதன் மேல் கொத்தமல்லி தளையை பொடியாக நறுக்கி அழகு படுத்தவும்.

பிறகு என்ன?? உருளைக்கிழங்கு சாகூ ரெடி.

க்விக் மோர்க்குழம்பு

2009-03-06T22:41:00.007+05:30

ஒரு நாள் பரவை முனியம்மா டி.வியில ஒரு சமையல் சொல்லிக் கொடுத்தாங்க. பேரு மறந்துடுச்சு. எளிமையா இருக்கேனு செஞ்சு கொடுத்தனுப்பினால் "மோர்க்குழம்பு சூப்பர்" அப்படீனு பாராட்டு. அவசர சமையலுக்கு ருசியா ஒரு குழம்பு கிடைச்சது. .

தேவை:
புளிக்காத தயிர் - ஒரு கப்
வற்றல் மிளகாய் - 2
தேங்காய் - 1/4 கப்
மஞ்சள் தூள், உப்பு - தேவையான அளவு
எண்ணைய், சீரகம் - தாளிக்க

செய்முறை:தேங்காயை நன்கு வழுவழுவென்று அரைத்துக் கொள்ளவும். தயிரில் உப்பு மஞ்சள் சேர்த்து மிக்ஸியில் ஒரு சுற்று சுற்றி எடுக்கவும். இத்துடன் அரைத்த தேங்காயை சேர்த்துக் கொள்ளவும். வாணலியில் எண்ணெய் காயவிட்டு சீரகத்தைப் பொரிய விடவும். பின் வற்றல் மிளகாயைக் கிள்ளி போடவும். இதனுடன் மோர் கலவையை சேர்க்கவும். நன்கு நுரை கூடி வரும் நேரம் தீயை அணைத்து விடவும். கமகம மோர்க்குழம்பு தயார். காய்கள் வேண்டுமென்றால் வேகவைத்து சேர்த்துக்கொள்ளலாம்.

எப்படி இருக்கு இந்த கிவிக் ரெசிபி?

சிக்கன் பிரை

2009-02-24T13:07:00.003+05:30

தேவை:

எலும்பில்லாத சிக்கன் துண்டுகள்- 250கிராம்,
மஞ்சள் தூள்- 1/4 டீஸ்பூன்,
உப்பு- தேவையான அளவு,
காய்ந்த மிளகாய்- 10,
எண்ணெய்- தாளிக்க,
தனியா பொடி- 1/4 டீஸ்பூனிற்க்கும் குறைவாக.

செய்முறை:

கொஞ்சம் மஞ்சள் தூள், சிறிதளவு உப்பு போட்டு கோழிக் கறியை நன்கு கழுவி விட்டு எலும்பில்லாதவாறு ஒரளவுக்கு பொடிப் பொடியாக வெட்டிக் கொள்ள வேண்டும். பின் வானலியில் சிக்கனை பிரை செய்ய தேவையான அளவு எண்ணெயை ஊற்றிக் கொண்டு காய்ந்த மிளகாயை விதைகளுடன் உடைத்துப் போட்டு, பின் சிக்கன் துண்டுகளையும், மஞ்சள் தூளையும், தனியா பொடியையும், தேவையான உப்பையும் சேர்த்து நன்கு வதக்க வேண்டும். கடைசியில் சிறிதளவு தண்ணீரை விட்டு தண்ணீர் சுண்டி சிக்கன் வெந்ததும் இறக்கி இதை தனியாகவும் சாப்பிடலாம், சாதத்துடனும் சேர்த்து சப்பிடலாம்..

டிஸ்கி: non-veg சாப்பிடாத நானே இதை சாப்பிட்டேன் என்றால் பாருங்களேன்!!!

பகோடா குழம்பு

2009-02-21T22:20:00.009+05:30

வீட்ல அவசரத்திற்கு காய் இல்லை என்றால் தொட்டுக் கொள்ள பகோடா வைப்பார்கள். ஆனால் என் பெரியம்மா அதை வைத்து குழம்பும் செய்வார்கள். எனக்கு மிகப் பிடித்த இக்குழம்பு, நான் செய்து என் தோழியருக்கும் பிடித்தது. எனவே இங்கே...

தேவை:
சி.வெங்காயம் - 10
பூண்டு - 4 பல்
தக்காளி - 1 பெரிது
குழம்பு பொடி - 1 தேக்கரண்டி
புளி - எலுமிச்சை அளவு
உப்பு - தேவையான அளவு
பகோடா - கட்டித் துண்டுகள் 5-10

தாளிக்க
எண்ணெய் - 1 தேக்கரண்டி
கடுகு, உளுத்தம்பருப்பு, கறிவேப்பிலை

செய்முறை:
சி.வெங்காயம், பூண்டு , தக்காளி, குழம்புபொடி, உப்பு சேர்த்து விழுதாக அரைக்கவும். புளியை 1 கப் தண்ணீரில் அரை மணி நேரம் ஊற வைத்து, கரைத்து எடுத்துக் கொள்ளவும். வாணலியில் எண்ணெய் விட்டு கடுகு, உளுத்தம்பருப்பு போட்டு வெடிக்கவிடவும். கறிவேப்பிலை உருவிபோட்டு, அரைத்த விழுதை நன்கு வதக்கவும். புளிக்கரைசலை ஊற்றி கொதிக்க விடவும். குழம்பு கொதித்து சற்று கெட்டியாகும் நேரம், பகோடா துண்டுகளைப் போட்டு, ஒரு நிமிடம் கொதிக்க விடவும். சற்று நேரம் கழித்து பரிமாறினால், பகோடா துண்டுகள் ஊறி கொஞ்சம் மெதுவாகவும், சுவையாகவும் இருக்கும்.

டிப்ஸ்: எனக்கு சென்னையில் கிடைக்கும் பகோடாவை விட மதுரை, சிவகாசி பக்கம் கிடைக்கும் பகோடாவில் செய்தால் தான் பிடிக்கும் :-).

பொட்டுக்கடலை உருண்டை

2009-02-11T14:50:00.002+05:30

ஒரு ஸ்வீட் செய்யலாம் வர்றீங்களா?

இதுக்கு என்ன வேணுமின்னா மொதல்ல ஒரு அரை மணி நேரம் எந்த பிக்கல் பிடுங்கல் இல்லாம கிடைக்கணும். அதுக்கு பிறகு இதெல்லாம் வேணும்,

பொட்டுக்கடலை : 1/4 கி
ச‌ர்க்கரை : 1/4 கி
நெய் : 1/4 கி
ஏலக்காய : ஒரு 5 போதும்.

பொட்டுக்கடலையை நல்லா வாணலி சட்டியில போட்டு பச்சை வாசனை போக வறுத்து எடுத்துக்கோங்க. (ரொம்ப கோபமா இருக்கும்போது வறுக்காதீங்க. அப்புறம் பொட்டுக்கடலை மஞ்ச நிறத்திலிருந்து கருப்பு நிறத்துக்கு மாறிட கூடிய அபாயம் இருக்கு). வறுத்த பொட்டுக்கடலையை கொஞ்சம் ஆறவைங்க.

அது ஆறதுக்குள்ள ஏலக்காயை தட்டி பொடி செஞ்சுக்கோங்க. இப்ப சர்க்கரை, ஏலக்காய், பொட்டுக்கடலை மூணையும் மிக்ஸியில போட்டு நல்லா நைசா அரைங்க. அரைச்ச மாவை ஒரு பாத்திரத்தில (வாய் பெரிசா இருக்கிற) போட்டுக்கோங்க.

அப்புறம் நெய்யை உருக்கி அதுல கொஞ்சம் கொஞ்சமா ஊத்தி உருண்டை பிடிங்க. அம்புட்டுதேன். அதிக பட்சம் அரை மணி நேரத்தில செஞ்சுடலாம். குழந்தைகளுக்கு கண்டிப்பா பிடிக்குமுங்க.

என்னோட அலுவலக தோழி ஒருத்தங்க அவங்க பொண்ணுக்காக அடிக்கடி செய்வாங்க. அவங்க காலேஜ் குவார்ட்டஸ்ல இருக்கிறதால அவங்க செய்யும்போது எல்லாம் போய் ஒரு நாலு இல்லாட்டி அஞ்சு உருண்டைன்னு அளவா சாப்பிட்டு வர்றது என்னோட வழக்கம்.

வெஜிடேரியன் முட்டை

2009-01-30T14:49:00.011+05:30

வெஜிடேரியனா முட்டை பொரியலும், ஆம்லட்டும் வேணும்னா இதை ட்ரை பண்ணி பாருங்க.

வெஜிடேரியன் முட்டை பொரியல்

தேவை:
பொட்டு கடலை - 1/2 கப்
பெ.வெங்காயம் - 1 (சின்ன வெங்காயமும் பயன்படுத்தலாம்)
ப.மிளகாய் -1
உப்பு - தேவையான அளவு
எண்ணைய் - 2 தேக்கரண்டி

செய்முறை
பொட்டுக்கடலையை மிக்ஸியில் போட்டு நைஸாக அரைத்துக்கொள்ளவும். வெங்காயம் மற்றும் பச்சை மிளகாயைப் பொடியாக நறுக்கவும். வாணலியில் எண்ணைய் ஊற்றவும். எண்ணெய் காய்ந்ததும் வெங்காயம், பச்சை மிளகாய் சேர்த்து நன்கு வதக்கவும். வெங்காயம் வதக்கியவுடன், பொட்டுக்கடலை மாவைப் போட்டு, கால் கப் தண்ணீர் சேர்க்கவும். தேவையான அளவு உப்பை சேர்த்து, நன்கு நீர் வற்றுமாறு கிளறவும். சுடச்சுட சாதத்திற்கு தொட்டுக் கொள்ள நன்றாக இருக்கும்.

வெஜிடேரியன் ஆம்லெட்

தேவை:
கடலை மாவு - 1/2 கப்
பெ.வெங்காயம் - 1 (சின்ன வெங்காயமும் பயன்படுத்தலாம்)
ப.மிளகாய் -1
உப்பு - தேவையான அளவு
எண்ணைய் - 2 தேக்கரண்டி

செய்முறை:
கடலை மாவை தோசை மாவு பதத்திற்கு உப்பு சேர்த்து கரைத்துக் கொள்ளவும். வெங்காயம் , பச்சை மிளகாயைப் பொடியாக நறுக்கவும். வாணலியில் எண்ணைய் ஊற்றவும். எண்ணெய் காய்ந்ததும் வெங்காயம், பச்சை மிளகாய் சேர்த்து நன்கு வதக்கவும். வெங்காயம் வதக்கியவுடன், கடலைமாவில் கலக்கவும். இதை தோசைக்கல்லில் தோசை போல் வார்த்து எடுக்கவும்.

டிப்ஸ்:
ஆம்லெட்டுக்கு வெங்காயம் , பச்சை மிளகாயுடன் கேரட் துறுவலும் வதக்கி சேர்த்துக் கொள்ளலாம்.
பீன்ஸ், பட்டாணி வேகவைத்து வதக்கி மாவுடன் சேர்க்கலாம்
கடலை மாவுடன் கொத்துமல்லி தழை நறுக்கி சேர்த்தும் வார்க்கலாம்.

மைக்ரோவேவ் ஓவனில் சாக்லேட் கேக்

2009-01-29T18:22:00.007+05:30

தேவை:

வெண்ணெய் - 50கி
சர்க்கரை - 1/2 கோப்பை
மைதா மாவு - 1/2 கோப்பை
பேகிங் பவிடர் - 1/2 மே.கரண்டி
முட்டை - 2
ஹெர்ஷீஸ் சாக்லேட் சிரப் - 1 கோப்பை

செய்முறை:

மைதா மாவும் பேக்கிங் பவுடரும் சேர்த்துக் கலக்கவும். வெண்ணெய், சர்க்கரை, முட்டை சேர்த்து நுரை பொங்கும் வரை ப்ளெண்டரில் அடித்துக் கொள்ளவும். இந்த கலவையுடன் மைதா மாவு கலவையும், ஹெர்ஷீஸ் சாக்லேட் சிரப் கலந்து நன்கு ப்ளெண்டரில் அடித்துக் கொள்ளவும்.

ஒரு கண்ணாடி பாத்திரத்தில் வெண்ணைய் தடவி இக்கலவையைக் கொட்டவும். பாத்திரத்தில பாதி அளவு மட்டுமே இக்கலவையால் நிரப்பவும். மைக்ரோவேவ் அவனில் "ஹையில்" ஏழு நிமிடங்கள் வைக்கவும். கேக் நன்கு எழும்பி இருக்கும். ஒரு குச்சியால் குத்திப் பார்த்தால் மாவு ஒட்டாது இருக்கும் பதம் பார்த்துக் கொள்ளவும். (மைக்ரோவேவ் அவனைப் பொறுத்து சமைக்கும் நேரம் வேறுபடலாம்)

சற்று ஆறியபின் கேக்கை எடுத்துP பரிமாறலாம்.

டிப்ஸ்:

- அலங்கரிக்க கேக் மீது ஹெர்ஷீஸ் சாக்லேட் சிரப் கொஞ்சம் ஊற்றிப் பரிமாறலாம்
- கலவையுடன் முந்திரி, உலர் திராட்சை, டூட்டி ப்ரூட்டி சேர்க்கலாம்

டிப்ஸ் தோழி டிப்ஸ்

2009-01-28T22:59:00.002+05:30

நிறைய பூண்டு உரிக்கணுமா? ரங்கமணி இருந்தா ஒ.கே. அவர்கிட்ட தள்ளி விட்டுடலாம். இல்லாட்டி வெறும் வாணலியில லேசா வதக்கிட்டு உரிங்க. ரங்கமணியை விட வேகமா உரிக்கலாம்.

இட்லிக்கு உளுந்து அரைக்கும் போது ஃபிரிட்ஜ் வாட்டர் ஊத்தி அரைங்க. மாவு நல்லா பொங்கி வரும். அதுக்காக 50 கிராம் உளுந்து ஊறப்போட்டுட்டு ஒரு கிலோக்கான மாவு வருமான்னு எல்லாம் எதிர்பார்க்க கூடாது.

இட்லி மாவு புளிச்சு போச்சுன்னா ரங்கமணிக்கு தோசை ஊத்தி தரலாம். அவர் சாப்பிட்ட பிறகும் மாவு மீதம் இருக்கா. கீழ எல்லாம் ஊத்த வேண்டாங்க. மாவுல ஒரு ரெண்டு சொம்பு தண்ணி ஊத்தி நல்லா கலக்குங்க. அந்த பாத்திரத்தை அப்படியே வெச்சு இருந்து ஒரு பத்து பதினைஞ்சு நிமிசம் கழிச்சு மேல நிக்கற தண்ணிய மட்டும் வடிச்சுட்டு தோசை ஊத்தினா நமக்கு புளிக்காத தோசை ரெடி.

இல்லை என்னால அத்தனை நேரம் வெயிட் செய்யமுடியாதுன்னு சொல்ற அவசர பார்ட்டியா? ஒரு அரை டம்ளர் பாலு சேர்த்து கலக்கி ஊத்துங்க. இப்ப புளிப்பு கம்மியாகி வாயில வெக்கலாம் ரேஞ்சுக்கு இருக்கும்

சப்பாத்தி நிறைய மீதியாகி போச்சா. மொட்டை மாடில கொண்டு போயி அதை காய வைங்க. காக்கா ஏதாச்சும் தூக்கிட்டு போயிடுமோன்னு பயமா இருந்தா ரங்கமணியை காவலுக்கு உக்கார வைங்க. அது காஞ்சு உடையற மாதிரி ஆனவுடன் எண்ணெய்ல பொரிச்சு சாப்பிட்டு பாருங்க. தோசையையும் இதே மாதிரி உபயோக படுத்தலாம்.

கஷ்டப்பட்டு நாம வெண்பொங்கல் செஞ்சு தருவோம். இந்த ரங்கமணியும் நம்ம கிட்டுமணிகளும் (குழந்தைங்கதானுங்க) அதுல இருக்கற மிளகை மட்டும் தனியா எடுத்து வெச்சு இருப்பாங்க. மிளகு உடம்புக்கு ரொம்ப நல்லதாச்சே. அதனால பொங்கல் செய்யும் போது மிளகை லேசா வறுத்து பொடி செஞ்சு போடுங்க. இப்ப என்ன செய்வாங்க? இப்ப என்ன செய்வாங்க?

சப்பாத்தி மிருதுவா இருக்கணுமா? ரங்கமணியை சூடு தண்ணியும் பாலும் ஊத்தி பிசைய சொல்லுங்க. (சூடு தண்ணி நம்ம கையில பட்டா என்ன ஆகறது, சப்பாத்தி வேணுமின்னா இது கூடவா செய்ய மாட்டாங்க.)

தட்டை பயறு / சுரைக்காய் சாப்ஸ்

2009-01-10T15:37:00.021+05:30

இன்றைய சமையல் - ரம்யா

இந்த சைடு டிஷ் தோசை, சப்பாத்தி, பூரி மற்றும் இட்லி சாப்பிட உபயோகப் படுத்தலாம்.

சுரைக்காய் பிடிக்காதவர்கள் உருளைக்கிழங்கு அல்லது பன்னீர் உபயோகிக்கலாம்.

3 பேர் சாப்பிட தேவையான பொருட்கள்

200 Grames தட்டை பயறு
2 Nos. பெரியவெங்காயம் (சாம்பாருக்கு நறுக்குகது போல் நறுக்கியது) 2 Nos. நாட்டு தக்காளி (பொடியாக நறுக்கி வைத்து கொள்ளவும்)
10 பல் பூண்டு (தோல் உரித்து வைத்துக் கொள்ளவும்)
3 Tea Spoon மிளகாய் பொடி
2 Tea Spoon தனியா பொடி
2 Tea Spoon சீரகப்பொடி
1/2 Tea Spoon கரம் மசாலா பொடி
உப்பு தேவையான அளவு
கறிவேப்பிலை தேவையான அளவு
கொத்தமல்லி தழை தேவையான் அளவு

செய்முறை விளக்கம்:

தட்டைபயறை(சிறியது) வேகவைத்து அதில் இருக்கும் தண்ணீருடன் எடுத்து வைத்து கொள்ளவும். சுரைக்காயையும் வேகவைத்து எடுத்து வைத்துக் கொள்ளவும்.

அடுப்பில் கடாய் வைத்து உங்களுக்கு தேவையான அளவு எண்ணெய் (நான் 3 Tea Spoon சேர்ப்பேன்) ஊற்றி அதில் பூண்டு, நறுக்கி வைத்த வெங்காயத்தை முதலில் போட்டு வறுத்துக் கொள்ளவும். பிறகு தக்காளியை சேர்த்து வறுக்கவும். பிறகு அதனுடன் மிளகாய் பொடி, உப்பு, மஞ்சள் தூள் சேர்த்து வதக்கவும். மிளகாய் தூள் வாசனை
மறைந்தவுடன், இதனுடன் தட்டைபயறு மற்றும் சுரைக்காய் சேர்த்து ஐந்து நிமிடங்கள் வேகவைக்கவும்.

கலவைகள் நன்றாக ஒன்றுடன் ஒன்று சேர்ந்து விடும்.

பிறகு வெந்த கலவையில் முதலில் கரம் மசாலா பொடி, சீரகப் பொடி, மல்லி தூள் சேர்த்து மூன்று நிமிடங்கள் வேகவைக்கவும். இந்த கலவையை Table Spoon பதிலாக ஜல்லி கரண்டி உபயோகப்படுத்தினால் காய்கள் அழியாமல் இருக்கும். (இந்த குறிப்பு எல்லா காய்களுக்கும் பொருந்தும்) .

பிறகு என்னா, அழகான ஒரு Bowel எல்லாவற்றையும் எடுத்து வைத்து அதன் மேல் கறிவேப்பிலை மற்றும் கொத்தமல்லி தழை சேர்த்து பரிமாறவும்.

பி. கு: தட்டை பயறு சிறியதாக இருந்தால் நன்றாக இருக்கும்

முட்டை பொரியல் / முட்டை சப்பாத்தி

2009-01-07T15:58:00.004+05:30

தேவையானவை:
முட்டை - 3
பெரிய வெங்காயம் - 1 (பொடியாக நறுக்கியது)
தக்காளி - 1 (பொடியாக நறுக்கியது)
மிளகாய்தூள் - 1 ஸ்பூன்
எண்ணேய் - தாளிக்க தேவையான அளவு
உப்பு - தேவையான அளவு

செய்முறை
முதலில் முட்டையை உப்பு போட்டு நன்கு நுரைவருவது போல் கலக்கவேண்டும். பின்பு வாணலியில் சிறிது எண்ணெய் விட்டு, கொஞ்சம் சோம்பு போட்டு அது வெடித்தவுடன்,
பொடியாக நறுக்கிய வெங்காயம் போட்டு நன்கு வதக்கிக்கொள்ளவேண்டும், பின்பு தக்காளியைப் போட்டு நன்கு வதக்கிக்கொள்ள வேண்டும்.இந்த வதக்கிய கலவையில் மிள்காய்தூள் போட்டு அதையும் ஒரு வதக்கல்.
இப்போது அடுப்பில் தீயை குறைத்துக் கொண்டும், கலக்கி வைத்துள்ள முட்டையை ஊற்றி நன்றாக அடிபிடிக்காமல் கிளறவேண்டும், முட்டை பொடியாக ஆகும் வரை.

ரசம் சாதத்துக்கு நல்ல மேட்சிங் இந்த முட்டைப் பொரியல்.

இரவு சப்பாத்தி மீந்து விட்டதென்றால் கவலைப்படாதீர்கள். மீந்த சப்பாத்திகளை நான்காக பிய்த்து, மிக்ஸியில் போட்டு ஒரு சுற்று சுற்றினால், கொஞ்சம் உதிரியாக ஆகிவிடும்.
இப்போது மேற்சொன்ன முறையில், மிளகாய் தூள் போட்டு வதக்கிய பின்னர், இந்த உதிரி சப்பாத்தியையும் போட்டு நன்றாக வதக்கவேண்டும். இப்போது அதன் மேல் முட்டை கலவையை ஊற்றி நன்றாக பிரட்டினால், முட்டை சப்பாத்தி ரெடி.
மீந்த சப்பாத்தி காலியாகிவிடும், மீண்டும் சப்பாத்திக்கு ஒரு சைட் டிஸ் தேவைப்படாது.

சில மேற்தகவல்கள்

1. முட்டை சீக்கிரம் வேகவேண்டுமானால், அதனோடு கொஞ்சம் உப்பை போட்டு வேகவையுங்கள். சீக்கிரம் வெந்துவிடும்.

2. முட்டையின் ஃப்ரெஷ்னெஸ் அறிய, அதனை தண்ணீரில் வையுங்கள். குறுக்கே இருந்தால் புது முட்டை, கொஞ்சம் சாய்ந்தாற் போல இருந்தால் அது 3-4 நாள் ஆன முட்டை, நேர்க்கோடாக இருந்தால் அது 10 நாட்கள் ஆன முட்டை. மிதந்து மேலே வந்தால், அது அழுகிய முட்டை.

Nutritional Analysis of Egg

Good points
Low in sugar
High in phosphorus
High in riboflavin
Very high in selenium
High in vitamin B12
Bad points
High in saturated fat
Very high in cholesterol

இன்றைய சமையல்

2008-12-30T18:57:00.014+05:30

ரம்யாவின் தக்காளி சாம்பார்!!!

இந்த தக்காளி சாம்பாரை இட்லி மற்றும் தோசையுடன் சாப்பிட்டால் அருமையாக இருக்கும். செய்முறை விளக்கம் பார்ப்போமா? 3 பேர் சாப்பிடுவதற்கு தேவையான பொருடகளை கீழே சொல்கிறேன். நீஙகள் எவள்ளவு வேண்டுமோ பொருட்களை அதற்கு ஏற்ப சேர்த்து கொள்ளுங்கள்.

தேவையான பொருட்கள்:

1 டீ ஸ்பூன் புழுங்கல் அரிசி

1 டீ ஸ்பூன் கடலை பருப்பு

2 டீ ஸ்பூன் தனியா

6 Numbers சிவப்பு மிளகாய்

10 Numbers கறிவேப்பிலை இலைகள்

4 Numbers சின்ன வெங்காயம் உரித்தது

(முழதாக இருப்பது - இது அரைப்பதிற்கு)

3 Numbers பல் பூண்டு

(சுமாராக நறுக்கி வைத்து கொள்ள வேண்டும், இது வதக்குவதிற்கு)

10 Numbers சின்ன வெங்காயம் பொடியாக நறுக்கியது.

(இது வதக்குவதிற்கு)

5 Numbers நாட்டு தக்காளி (நன்றாக பழுத்தது) ஒன்றரை

தேக்க்கரண்டி தேங்காய் துருவல்

செய்முறை விளக்கம்:-

கடாயில் ஒரு ஸ்பூன் எண்ணெய் விட்டு அரிசியை முதலில் பொரித்துக்கொள்ள வேண்டும். பிறகு சிவப்பு மிளகாய், கடலைபருப்பு, தனியா இவை அனைத்தையும் நன்றாக வறுத்துக்கொள்ள வேண்டும். பொன் நிறம் ஆனவுடன், உரித்த சின்ன வெங்காயம் மற்றும் கருவேப்பிலை சேர்த்த சிறிது நேரம் வதக்க வேண்டும். பிறகு தக்காளியை வறுத்த கலவைகளுடன் சேர்த்து நன்றாக அரைத்துக் கொள்ளவேண்டும் வேண்டும்.

கடாயில் இரண்டு டீ ஸ்பூன் எண்ணெய் விட்டு கடுகு, உளுந்து தாளித்து, பிறகு நறுக்கிய சின்ன வெங்காயம் மற்றும் பூண்டு (நறுக்கி வைத்தது) வாணலியில் போட்டு பொன்னிறம் வரும் வரை வதக்கவும். பிறகு அரைத்த கலவையை சேர்த்து, அதனுடன் சிறிது மஞ்சள் பொடி, தேவையான அளவு உப்பு சேர்த்து, கொதிக்கவைத்து இறக்கவும். (முக்கியமாக தக்காளி பச்சை வாசனை போகணும்). பிறகு அதனுடன் சிறிது கறிவேப்பிலை, சிறிது கொத்தமல்லி தலை மேலாக போட்டு. சூடான இட்லி, தோசையுடன் பரிமாறவும்.

பின் குறிப்பு:--

குழந்தைகள்: 2 இட்லி சாப்பிடுபவர்கள் 4 இட்லி சாப்பிடுவார்கள்.

ரங்கமணிகள்: 5 இட்லி சாப்பிடுபவர்கள் 10 இட்லி சாப்பிடுவார்கள்.

டர்னிப் பொரியல்

2008-12-29T00:25:00.002+05:30

எனக்கு தெரிஞ்சு அனேகமா யாருக்குமே இந்த காய் பிடிக்காது. காய் எப்படி இருக்குமுன்னு கேட்கறவங்க மேல இருக்கற படத்தை பாருங்க.

ஒரு நாள் என் ப்ரெண்டு வீட்டுல இந்த காயில பொரியல் செஞ்சு குடுத்தாங்க. செம சூப்பரா இருந்ததுங்க. அதைதான் இன்னிக்கு மதியம் நான் செஞ்சேன். அதுக்கான சமையல் குறிப்புதான் இது.

தேவையான பொருள்

டர்னிப் பொரியல் அப்படின்றதால
டர்னிப் 1/2 கி.
பெரிய வெங்காயம் 2
கருவேப்பிலை கொத்துமல்லி

அரைக்க

கடலை பருப்பு 3 டேபிள் ஸ்பூன்
நிலக்கடலை 50 கி
பூண்டு 5 பல்
வரமிளகாய் 8

எப்படி செய்யணுமின்னா

டர்னிப்பை சுத்தமா கழுவி தோல எடுத்துட்டு சின்ன சின்ன துண்டா கட் செஞ்சுகோங்க. பிறகு கொஞ்சம் மஞ்சள் தூள் + உப்பு சேர்த்து குக்கர்ல வெச்சு ஒரு விசில் வர்ற வரைக்கும் வையுங்க. விசில் வர்றதுக்குள்ள அரைக்க குடுத்து இருக்கற பொருளையெல்லாம் வெறும் வாணலியில லேசா வறுத்து எடுத்துட்டு மிக்ஸியில போட்டு கொஞ்சம் கரகரப்பா அரைச்சுகோங்க. (இந்த பொடி மீதம் இருந்தா வெச்சு ஒரு பத்து நாளைக்கு உபயோகபடுத்தலாம்)

இப்ப பார்த்திங்கன்னா அந்த டர்னிப் மஞ்சள்+உப்பு தண்ணியில வெந்து லேசா சுணங்கி போயிருக்கும். அதை அடுப்புல இருந்து எடுத்து தண்ணிய வடிச்சு தனியா வைங்க. அப்புறம் திரும்ப அந்த வாணலியில கொஞ்சமா எண்ணைவிட்டு கடுகு தாளிச்சு கூடவே க.பருப்பு, உ.பருப்பு எல்லாம் போட்டு கட் பண்ணி வெச்சு இருக்கற பெ. வெங்காயத்தையும் கருவேப்பிலையும் போட்டு வதங்குங்க. இப்ப கொஞ்சமே கொஞ்சம் உப்பு சேர்த்துகிட்டா சீக்கிரம் வதங்கிடும். அப்புறம் வேகவைச்ச டர்னிப் போட்டு அதுக்கு கூட அரைச்சு வெச்சு இருக்கற பொடி ஒரு ஆறு ஏழு ஸ்பூன் தாரளாமா போட்டு எல்லாம் நல்லா சேர்ந்து வர்ற வரைக்கும் கிளறி அடுப்பில இருந்து இறங்கி வெச்சு கொத்துமல்லி போடுங்க. அவ்வுளவுதான்.

பொடி நைசா அரைக்காதீங்க. அந்த கரகரப்புதான் இதுல டேஸ்ட்டே. இதே மாதிரி டர்னிப்புக்கு பதிலா மேரக்காய் (செளசெள), சுரைக்காயில கூட செய்யலாம்.

முதல் சமையல்

2008-05-12T17:25:00.004+05:30

எத்தனை நாளைக்குத்தான் ஒருத்தரையே கஷ்ட படுத்திகிட்டே இருக்கறது அதனாலதான் இந்த புது வலைப்பூ. இதிலே வாழைப்பூ வரும். ஆனா வாளமீனு வராது. ஏன்னா நான் வெஜிடேரியன். (நான் - வெஜிடேரியன் இல்லைங்க. நான் சைவம்). நல்ல சைவ சமையலை சாப்பிட நினைக்கிறவங்க முடிஞ்ச வரை இங்க வர குறிப்புகளோட உங்க அனுபவ குறிப்புகளையும் சேர்த்து செய்யுங்க. ஏன்னா அப்பதான் நல்லா வரும்

இதெல்லாம் வேணும்
• தேங்காய் துருவல் - ஒன்றரை கப்
• பச்சரிசி - கால் கப்
• வெல்லம் - கால் கிலோ
• ஏலக்காய் - 4
• முந்திரி - 6
• திராட்சை - 10
• நெய் - 2 தேக்கரண்டி
• உப்பு - அரை தேக்கரண்டி

இப்படிதான் செய்யணும்

முதலில் வெல்லத்தை நுணுக்கி வைத்துக் கொள்ளவும். ஏலக்காயை பொடி செய்து வைத்துக் கொள்ளவும். பச்சரிசியை கழுவி, 15 நிமிடம் ஊற வைக்கவும்.
ஊற வைத்த அரிசி மற்றும் தேங்காய் துருவலை மிக்ஸியில் போட்டு அரை கப் தண்ணீர் ஊற்றி நைசாக அரைத்து எடுத்துக் கொள்ளவும்.
ஒரு பாத்திரத்தில் 5 கப் தண்ணீர் ஊற்றி கொதிக்க வைக்கவும்.
தண்ணீர் கொதித்ததும் அதில் அரைத்த தேங்காய் விழுதைப் போட்டு உப்பு சேர்த்து 5 நிமிடம் கிளறி கொண்டே இருக்கவும்.
அதனுடன் பொடி செய்து வைத்திருக்கும் வெல்லம், ஏலக்காய் தூள் சேர்த்து வெல்லம் கரையும் வரை 3 நிமிடம் கிளறவும்.
வாணலியில் நெய் ஊற்றி முந்திரி, திராட்சை இரண்டையும் போட்டு ஒரு நிமிடம் வறுத்துக் கொள்ளவும்.
பாயாசம் பொங்கி வந்ததும் வறுத்த முந்திரி பருப்பை போட்டு இறக்கவும்.
சூடான, சுவையான தேங்காய் பால் பாயாசம் இப்போது ரெடி

நீங்க நல்லா செஞ்சிருந்தா கடைசியில் இப்படிதான் வரும்